6.2 Jardueraren adierazleak
Memoriaren apartatu honen xedea da erakunde autonomo honen, alegia, Nafarroako Foru Ogasunaren, eginkizunaren gaineko ikuspegi bat izateko baliagarria izanen den adierazleren bat jasotzea.
Interesgarria iruditu zaigu horretarako gure inguruko Ogasunek erabiltzen dituztenen antzeko parametroak baliatzea. Erabateko garrantzirik eman gabe ere, askotariko inguruabarren eraginpean sortzen direlako, eta kontabilizazio sistema desberdinek ezartzen dituzten mugen eraginpean, egia da, betiere, lortutako emaitzetara agudo hurbiltzeko modua eskaintzen dutela.
Aukeratutako adierazleak hauek izan dira:
“Tributu Kontroleko Jarduera” adierazlea
Tributuen zuzeneko kudeaketaren ondorioz Nafarroako Foru Ogasunak 2020an lortu zuen bilketa likidoa 2.765,5 milioi eurokoa izan zen (zeharkako zergapetzeagatiko zerga doikuntzak kontuan hartu gabe).
Beste alde batetik, tributu kontrolerako jardueraren emaitzak, 2020an, 174,7 milioi eurokoak izan ziren.
Bi magnitude horien kozientea, numeradorean hartuta tributuen kontrolerako jardueran lortutako emaitzen zenbatekoa, eta denominadorean, berriz, tributuen zuzeneko kudeaketaren ondoriozko bilketa likidoa (zeharkako zergek eragindako zerga doikuntzak kontuan hartu gabe), ehunekotan adierazita, % 6,32koa da.
2019ko adierazlearen ehunekoaren gainetik dago, 0,1 puntu.
“Jarduna” adierazlea
Tributuen kontrolerako jardueraren emaitzak, 2020an, 174,7 milioi eurokoak izan ziren.
Jardunaren adierazlea sortu da, horretarako kalkulatuz emaitza/langile kopurua ratioa, era horretan neurtzeko, batez besteko balioetan, Nafarroako Foru Ogasuneko langile bakoitzak tributuen kontrolerako jardueraren emaitzei egiten dien ekarpena.
Numeradorean sartzen dira tributuen kontrolerako jardueraren emaitzak, eta denominadorean pertsonen kopuru osoa, hau da, abenduaren 31n Nafarroako Foru Ogasunean enplegatuta zeuden pertsonen kopurua. Kontuan hartu behar da tributu kontroleko jarduera ezin dela aurrera eraman erakunde autonomo osoaren jarduketa integratua tartean ez bada.
Jardunaren adierazle horren arabera, 2020an, Nafarroako Foru Ogasuneko enplegatu bakoitzaren ahaleginaren emaitza, batez beste, 534.244,59 eurokoa izan da, tributu kontroleko jardueran.
2019ko emaitza baino txikiagoa da, 14.656,63 euro (% 2,68) gutxiago, hain zuzen ere.
“Efizientzia” adierazlea
Tributu kontroleko jardueraren efizientzia neurtzeko, magnitude hauen arteko kozientea kalkulatzen da:
- Numeradorean konputatzen da tributu kontrolen jardueraren emaitzetan lortutako zenbatekoa (174,7 milioi euro).
- Denominadorean konputatzen da aurrekontu osoaren zenbatekoa, betebehar aitortuen balioetan, eta Estatuari egin beharreko ekarpena kenduta (29,6 milioi euro).
Efizientziaren adierazle horren arabera, 2020an, Nafarroako Foru Ogasunean gastatutako euro bakoitzetik, 5,908 euro lortu dira, tributu kontroleko jardueran.
2019ko adierazlearen aldean murrizketa adierazten du, 0,597 euro gutxiago (% 9,18).
“Tributu bilketa likidoaren kostua” adierazlea
Kudeatutako baliabideen aplikazioan izan den efizientzia neurtzeko, magnitude hauen arteko kozientea kalkulatzen da:
- Numeradorean konputatzen da bere gain hartutako kostuen zenbatekoa, NFOren aurrekontu osoaren arabera (Estatuari egin beharreko Ekarpena kenduta), betebehar aitortuen balioetan (29,6 milioi euro).
- Denominadorean konputatzen da bilketa likido osoaren zenbatekoa, barne sartuta, bai zuzeneko kudeaketan lortutakoa, bai zeharkako zergek eragindako zerga doikuntzak. (3.627,1 milioi euro).
Koziente horren arabera, diru-sarreren kudeaketaren kostuaren adierazlea, 2020an, 0,815 eurokoa izan zen, bildutako 100 eurotik.
Jaitsiera txiki bat adierazten du 2019koaren aldean, orduan 0,681 eurokoa izan baitzen, bildutako 100 eurotik.
“Langile kopurua 10.000 biztanleko” adierazlea
Foru Ogasuneko langileak eta Nafarroako biztanleria erlazionatzen dituen ratioa aurkeztu da.
2020an, Nafarroako Foru Ogasuneko langileen ratioa, 10.000 biztanleko, 4,95 da. Kopuru handixeagoa da 2019an baino, orduan 4,86 baitzen.
Adierazle horien datuak, 2019 eta 2020rako, honako koadro honetan bildu dira:
73. koadroa. NFOren jardueraren adierazleak